اسلامية رغم كفرها !

كنت دايما بتعجب من جملة اسلامية اسلامية الى  بيقولها  الناس فى المظاهرات  والشعارات   بتاعت الانتخابات من الاحزاب  الى مراجعيتها اسلامية , ماكنتش بتوقف اوى عند الجملة عشان ماكنتش بتشد ليها  اوى, لانى الحمد لله مسلمة وعايشة فى دولة مسلمة ودستور المفروض انه مرجعيته الشريعة ومبادىء الاسلام مع احترام الاديان الاخرى و انها تأخد كل حقوقها فى البلد
اول مرة النهاردة افتكر الجملة ديه فى وقت النواب كلهم حاملين لكتاب الله وبقينا سلطة تشريعية  كلها اسلامية اسلامية , افتكرتها والجنزورى بيقول مصر لن تركع لاحد للمرة التانية على التوالى بعد قضية التمويل الاجنبى وودلوقتى لن تركع فى قضية الواردات والصادرات .
طيب ماهى ركعت اولانى يعنى ركعت  للتمويل الاجنبى الى مش مقتنعة انها قضية موجودة من الاساس , او لو موجودة يبقى مصر كلها بتاخد تمويل اجنبى وخليجى من المعونة الامريكية لغيرها , احنا بعد الثورة كانو رؤساء الوزراء بيفخرو انهم رايحين دول خليجية وعربية عشان يمولونا  ويساعدونا , دلوقتى التمويل بقى حرام وعيب وركوع  لمجرد ادخال فكرة الطرف التالت فى دماغ الناس البسيطة , ومش اول مرة مصر تركع لاحد مصر طول عمرها راكعة لامريكا واسرائيل وغيرها   الى مستنزفينا ومستنزفين ثراوتنا .ولا بنستفيد من تمويل او معونة بالعكس الكبار بيعمرو خزاينهم ,واحنا الى بنركع  مع مصر  الراكعة


عرفت معنى اسلامية  دلوقتى  فى دولة اهتمت بمظهر الدين  فزاد الكفر فى قلبها   , فى دولة يحكمها الرعاع  فلم تجد عادل ينصرها  , فى دولة ركعت لغير الله . فمن يركع لغير الله كفر,. يعنى حتى الكبار وهى اسلامية كفروها !!!!!!!

للاذكياء فقط

بداية مش هعلق على المجزرة الى حصلت فى ماتش الاهلى وبور سعيد. لان الى فاهم هو الى هيفهم ان ديه مجزرة مرتبة, وان الى حصل ده مدبر, وان التراس الاهلى ده جمهور مش عادى وانه  مشارك فى المجتمع بشكل كبير مش فى الكورة بس  ,  فاالى فاهم  فاهم  والى  مش فاهم خليه هيفهم قريب ربنا كبير ..

انا هتكلم عن جلسات مجلس الشعب بعد المجزرة  , اد ايه كلنا كنا فرحانين ان بقى فيه اخيرا مجلس شعب منتخب   وقاعدنا نقول اول مجلس شعب منتخب من ايام الفراعنة مش مهم بقى  الانتخابات كان فيها سكر, كان فيها لحمة كان فيها خضار, كان فيه متاجرة باسم الدين  مش قصة. عالفكرة هنخلص منها بعد شوية لان المشكلة مش فى الحزب الى بيعمل كده ,المشكلة لسه عندنا احنا , سببها  حاجات كتير جهل وفقر مخلينىا مش حاسيين انها بلدنا لسه .  وحاجات كتير هنخلص منها بأذن الله بكيفنا او غصب عننا هنخلص منها .

  مجلس شعب بعد المجزرة اداء ضعيف .مش بقدر افهم نفسية النائب لما يروح بيته بعد ماكدب ودلس الحقيقة وترك قلوب مكلومة قلبها مليان نار حرقة فراق ضنا او اخ او جار او صاحب .

مش قادرة  افهم نفسية الى فاهمين انهم استلمو مصر عبارة عن كريمة فيها شوية ناس متعلمين مثقفين ماشيين جنب الحيط.

 لازم قبل ماحد يقعد على كرسى يبقى فاهم انه مسئول عن مجتمع كامل فيه البلطجى والحرامى والمسجل والفقير وطفل الشارع والغنى والمحترم والمثقف  والى مش مثقف والى ماشى جنب الحيط والى نايم جوه الحيط  والى ماشى فى نص الطريق بيراقبه وعايز يعرف  صوته راح فين فبيعارضه او بيصقفله  مع اختلاف المواقف .

   والى مش عاجبه اهو انت بقيت مسئول, ومسئول عن ان الفقير ينداس وان اطفال الشوارع شكلهم شوارع فيستاهلو ان الشرطة تضربهم وتسحلهم وتقبض عليهم  وتلبسهم التهم الى انتم وهما مش عارفيين مين الى بيعملها فاتيجو على الضعيف وتفرضو سلطتكم  وتشهرو سلاحكم  عشان الفقير والغلبان وطفل الشارع مالهمش تمن  وده بيدل على ضعفكم وغبائكم وقلة حيلتكم , وعشان حقوق الانسان لما  تيجى عند بلدنا وتقف  ولو اتكلمت فيها تبقى بتشتم وكل الى له والى مالوش فى الكلام يطلع يقولك يبقى حد يقولى حقوق انسان وكأن ان الى عايشيين فى البلد دون عن  البلاد التانية  خرفان !!!!!!!

-اتقوا الله ياحاملين كتاب الله , اتقوا الله يامتبعين سنة الرسول ومربييين دقنكم , اتقوا الله يالى قاعد على الكرسى منصب وجاه , اتقى الله يالى فاهم انك لما تنافق اصحاب المناصب  بتحمى البلد ولما تدوس على الغلبان   وطفل الشارع والضعيف يبقى بتحقق العدل فى الارض 

اتقوا الله الدنيا دوارة النهاردة ليك بكرة عليك .

بلطجة ولكن

بما اننا دلوقتى بنسمع  كلمة بلطجة وبلطجية بمعدل   مليون مرة فى الساعة الواحدة فى كل حتة , فى كل مكان  وانت صاحى وانت نايم وانت بتتفرج على التليفزيون  وانت بتتكلم فى التليفون وانت فاتح الفيس بوك وبتتفرج على التعليقات الى بقت مالهاش وصف الصراحة , احنا  انغلقنا فى كل حاجة الا الشتايم فتحنا على الرابع  وباقصى سرعة الشتايم   ماتفهمش ده عشان احنا فجأة حسانا ان عندنا رأى فمحدش عارف يعبر عن رأيه او اصلا الى بيتكلم ماعندوش رأى فأسهل حاجة انه يشتم فظهر  الى بسميه (بلطجة الكومنتات ) 

 قعدت انا بقى افكر هو ليه احنا وصلنا للمرحلة بتاعت البلطجة  فى كل حاجة ديه , فقولت مثلا لو عندنا اسرة والاب  مابيعرفش لغة فى التعامل غير الضرب والشتيمة  وعياله اتربه على كده , تفتكروا ولاده هيطلعو ايه .؟

انا اقولكم هيطلعوا زيه مابيعرفوش يتعاملو غير بلغة ديه   مع اى موقف يقبلوه . او بقى يطلع منهم الى قريلو كلمتين وفاهم شوية مايتعملش بنفس الاسلوب ويحاول يحارب الى اتربى عليه .

هو ده مثال صغير للبلطجة الكبيرة الى عايشيين فيها . مش موجودة فينا ماتخلقناش بلطجية لا قدر الله ولكن هى سمة بتتزرع فينا  انعكاس من المجتمع علينا ,

 يعنى لو مجمتع مافيهوش قانون هتزيد البلطجة لان الحق حق , و الحق لازم يتأخد زيه زى اولويات البنى ادم اكله شربه نومه   لو ماخدش حقه يبقى ضاع  جزء من انسانيته  الى ربنا خلقه عليها

نيجى للحكام ومن يعاونهم فى ادارة البلد تعالو نشوف  هما بيتعاملو مع المواقف ومعارضيهم والازمات  الى بتحصل  لو بصينا هنلاقى تعاملهم تعامل بلطجية  من الدرجة الاول بيحاول يدافع عن نفسه فقط بشتى الطرق الضرب السحل التعذيب الاعتقال القتل .

 قعدت افكر هو مين اخترع فكرة ضرب المتظاهرين بالنار  وقتلهم لاقتنا وخدنها من المستعمرين ,يعنى مثلا الاستعمار الانجليزى كان بيتعامل مع مظاهرات مصطفى كامل  بالشكل ده , يعنى الحكام بيتعاملو مع بلدهم بمنطق المستعمر  يعنى بمنطق( قاعد على قلبكم حتى لو قلبكم وقف انا قاعد قاعد )

لو خدنا اى مثل للدولة متحضرة الرئيس فيها عادى يعنى موظف زى اى موظف فى البلد بيتعامل مع  الشعب بالقانون والدستور وبس تلاقى الشعب متحضر وكلنا نقول شوفوهم هما شعب متحضر واحنا شعب همج

مع ان ياجدع فيه فرق كبير , طب  هاتولنا رئيس يتعامل معانا بالقانون ومش هتلاقينا همج هو مش الرئيس فى مجتمعاتنا بابا وماما وانور وجدى خلاص هاتولنا اب محترم نطلعلكم عيال محترمين :))